အင်ဒိုနီးရှားရေငုတ်သင်္ဘော ၃ ပိုင်းကွဲလျက် ပြန်တွေ့

News

အင်ဒိုနီးရှားနိုင်ငံ ဘာလီ ပင်လယ်ထဲ နစ်မြှုပ်သွားတဲ့ ရေငုပ်သင်္ဘောကို ရှာဖွေတွေ့ရှိခဲ့ရာမှာ အပိုင်းသုံးပိုင်းကွဲနေပြီး အမှုထမ်း ၅၃ ဦးလုံးလည်း သေဆုံးခဲ့ကြောင်း အင်ဒိုနီးရှားစစ်တပ်က တနင်္ဂနွေနေ့က ကြေညာခဲ့ပါတယ်။

သင်္ဘော အပျက်အစီးတွေကို စနေနေ့က သမုဒ္ဒရာအောက် ကြမ်းပြင်မှာရှာဖွေတွေ့ရှိခဲ့တာဖြစ်ပြီး ရေငုပ်သင်္ဘောကိုတော့ အသံလှိုင်းနဲ့ ရေအောက်ဝတ္ထုပစ္စည်း တည်နေရာကိုရှာဖွေတဲ့ စက်ကိရိယာအကူအညီနဲ့ ရေငုပ်နိုင်တဲ့အကွာအဝေးထက်ကျော်လွန်တဲ့ မီတာ ၈၅၀ (၂,၇၉၀ ပေ) အကွာအဝေးမှာ ရှာဖွေတွေ့ရှိခဲ့တာဖြစ်တယ်လို့ စစ်တပ်ရဲ့ ကြေညာချက်မှာဖေါ်ပြထားပါတယ်။

ကယ်ဆယ်ရေးသမားတွေ ရှာဖွေတွေ့ရှိခဲ့တဲ့ အရာဝတ္ထုအသစ်တွေထဲမှာ- သက်တမ်း ၄၄ နှစ်ကြာမြင့်နေပြီဖြစ်တဲ့ KRI Nanggala ရေငုပ်သင်္ဘော ၄၀၂မှာ ပါသွားတယ်လို့ယူဆရတဲ့ အသက်ကယ်အင်္ကျီတခုလည်း ပါဝင်ပါတယ်။
အင်ဒိုနီးရှား ရေငုပ်သင်္ဘောဟာ တော်ပီဒိုပစ်ခတ်လေ့ကျင့်ရေး ပြုလုပ်ဖို့ ပြင်ဆင်နေစဉ် ဗုဒ္ဓဟူးနေ့မှာ အဆက်အသွယ်ပြတ်တောက်ခဲ့တာပါ။

KRI Nanggala ရေငုပ်သင်္ဘောကို ပြန်တွေ့ချိန်မှာ ကိုယ်ထည်၊ ပဲ့ပိုင်း နဲ့ အခြား အစိတ်အပိုင်းတွေအဖြစ် အပိုင်းသုံးပိုင်းကွဲနေပြီး အဓိက အစိတ်အပိုင်းမှာ အက်ကွဲနေတယ်လို့ စစ်တပ်အကြီးအကဲ ဗိုလ်ချုပ်ကြီး Hadi Tjahjanto ကသတင်းထောက်တွေကို ပြောကြားခဲ့ပါတယ်။
အင်ဒိုနီးရှားသမ္မတ Joko Widodo ကလည်း နစ်မြုပ်သွားတဲ့ ရေငုပ်သင်္ဘောပေါ် ပါသွားသူ ရေယာဉ်အမှုထမ်း ၅၃ ဦးရဲ့ မိသားစုဝင်တွေဆီကို သူ့အနေနဲ့ အလွန်ပဲ စိတ်ထိခိုက်ဝမ်းနည်းရကြောင်း တနင်္ဂနွေနေ့က အမှာစကားပြောဆိုခဲ့ပါတယ်။ အင်ဒိုနီးရှား ရေငုပ်သင်္ဘော နစ်မြုပ်ရတဲ့အကြောင်းကိုတော့ တိတိကျကျ သတ်မှတ်ဆုံးဖြတ်နိုင်ခြင်းမရှိသေးပါဘူး။ ရေငုပ်သင်္ဘောရဲ့အရေးပေါ်လုပ်ထုံးလုပ်နည်းတွေကိုပြန်ပြီး လည်ပတ်ဖို့အတွက် လျှပ်စစ်ဓာတ်အားပြတ်တောက်မှုဟာ အတားအဆီးဖြစ်စေနိုင်တယ်လို့ အင်ဒိုနီးရှားရေတပ်က စောစောပိုင်းက ပြောဆိုခဲ့ပါတယ်။

credit – VOA

Leave a Reply