ဂျပန်အိုလံပစ်ကျေးရွာမှာ ပထမဆုံး ကိုဗစ်ပိုးတွေ့

News

ဂျပန်အိုလံပစ်အားကစားရွာမှာ ပြည်ပကလာသူတဦး ကိုဗစ် ဓာတ်ခွဲအတည်ပြု တွေ့ရှိလိုက်ပါတယ်။ ဒါကြောင့် လာမယ့်သီတင်းပတ်ထဲ ကျင်းပဖို့ရှိနေတဲ့ အိုလံပစ်ပြိုင်ပွဲမှာ ရောဂါကူးစက်မှုတွေ ဖြစ်လာမှာ ပိုပြီး စိုးရိမ်စရာတွေ ရှိနေပါတယ်။

ပြိုင်ပွဲဝင် တသောင်းကျော်ကို အဲဒီအားကစားရွာမှာ ထားရှိမှာဖြစ်ပါတယ်။ အခုအချိန်အထိဆိုရင် ပြည်တွင်းပြည်ပက အားကစားသမား ၄၀ မှာ ကိုဗစ်ရောဂါပိုး တွေ့ရှိထားပြီး ဖြစ်ပါတယ်။ အခုတကြိမ်ကတော့ အားကစားရွာမှာ ရောက်ရှိနေတဲ့ လူတဦးမှာ ပထမဆုံးအကြိမ် ကိုဗစ်ပိုးတွေ့တာဖြစ်တယ်လို့ ဂျပန်အိုလံပစ်ကော်မတီ ခေါင်းဆောင်က ဒီနေ့ အတည်ပြုပေးလိုက်ပါတယ်။

“အားကစားရွာထဲက တဦးမှာ ပထမဆုံးအနေနဲ့ ကိုဗစ်ပိုး စစ်ဆေးတွေ့ရှိထားကြောင်း အစီရင်ခံထားပါတယ်။ မနေ့ကပဲ PCR ပုံမှန်စစ်တဲ့နည်းနဲ့ တွေ့ခဲ့တာပါ။ အခု သူ့ကို ဟိုတယ်မှာ သီးသန့်ခွဲထားပါတယ်” လို့ ၂၀၂၀ တိုကျိုအိုလံပစ် အမှုဆောင်အရာရှိချုပ် Toshiro Muto က ပြောသွားတာပါ။

အခုပိုးတွေ့ထားသူက နိုင်ငံခြားကလာတဲ့ ပွဲစီစဉ်သူတဦးဖြစ်တယ်လို့ အရာရှိချုပ် Muto က ပြောခဲ့ပေမယ့် ဘယ်နိုင်ငံက ဘယ်သူဆိုတဲ့ အတိအကျကိုတော့ ပုဂ္ဂိုလ်ရေးဖြစ်လို့ ထုတ်မပြောချင်ဘူးလို့ ဆိုပါတယ်။

ကိုဗစ်ကာလ ကျင်းပရတဲ့ အိုလံပစ်ပွဲကြီးမှာ ပရိသတ်တွေ လာကြည့်ခွင့်မပေးတာအပြင် Mask တပ်တာ အပါအဝင် ကိုဗစ်ဆိုင်ရာ အကြိမ်ကြိမ်စစ်ဆေးချက်နဲ့ သီးသန့်ခွဲနေမှုတွေကို တင်းကျပ်စွာ ချမှတ်လုပ်ဆောင်ထားတာကနေ အခုလို ပိုးစတွေ့လာတာပါ။

ဇူလိုင် ၂၃ ကနေ သြဂုတ် ၈ ရက်အထိ လုပ်မယ့် ဒီပွဲမှာ ပါဝင်သူတွေအနေနဲ့ နောက်အကျဆုံး ကပ်ရောက်ပြီး အစောဆုံးပြန်ထွက်ဖို့ စည်းကမ်းတွေပါ ချထားပါတယ်။ ဂျပန်ပြည်သူ အများစုကတော့ ပိုးအလွန့်အလွန်ကူးစေတဲ့ ပွဲတော်ကြီး ဖြစ်လာပြီး ဝန်ပိနေပြီးသား ကျန်းမာရေးစနစ်အပေါ် ပိုဆိုးသွားစေမှာ အထူးစိုးရိမ်နေကြပါတယ်။

VOA

Leave a Reply